VIJIJI 347 KUPATA UMEME ITILIMA

  Naibu Waziri wa Nishati na Madini, Mhe.Dkt.Medard Kalemani akizindua Mradi wa Umeme Vijijini (REA)Awamu ya Tatu Mkoani Simiyu katika Kijiji cha Nangale wilayani Itilima (kushoto) Mkuu wa mkoa huo, Mhe.Anthony Mtaka.

NAIBU Waziri wa Nishati na Madini, Dkt Medard Kalemani amezindua Mradi

wa Umeme Vijijini Awamu ya Tatu (REA III) katika Mkoa wa Simiyu ambapo

vijiji 347 mkoani hapo vipata nishati hiyo.

Uzinduzi  huo ulifanyika juzi katika Kijiji cha Nangale ,Kata ya

Ndolelezi wilayani  Itilima na kuhudhuriwa na viongozi

mbalimbali wa Serikali, Wabunge na wananchi wa mkoa wa Simiyu.

Naibu Waziri alitaja lengo jingine la REA III kuwa ni kupeleka umeme

kwenye vijiji vyote ambavyo havijapata umeme sambamba na hayo

alibainisha malengo mengine kuwa ni kupeleka umeme kwenye Taasisi zote

za umma na nyingine zilizo rasmi hata kama siyo za umma.

“Taasisi hizo ni pamoja na Vituo vya Afya na Zahanati, Shule pamoja na

Taasisi nyingine muhimu pia kwenye miundo mbinu ya maji ambayo ni

mitambo ya maji,” alifafanua.

Akizungumza na wananchi  mara baada ya uzinduzi, Dk Kalemani

alibainisha malengo ya REA III ambapo alisemaa lengo la kwanza la

Mradi huo kabambe ni kupeleka umeme kwenye vitongoji vyote .

“Katika Mradi wa REA II tulikuwa tunapeleka umeme katika Kituo tu cha

Kijiji, siyo Kijiji chote  REA III itafika katika vitongoji

vyote.”alisema huku akishangiliwa na wananchi waliohudhuria hafla

hiyo.

 

Baadhi ya wananchi wa Wilaya ya Itilima wakimsikiliza Naibu Waziri wa Nishati na Madini, Mhe.Dkt.Medard Kalemani(hayupo pichani) wakati wa wakati wa uzinduzi wa Mradi wa Umeme Vijijini (REA)Awamu ya Tatu Mkoani Simiyu katika Kijiji cha Nangale wilaya ya Itilima.

Pia aliwashukuru wananchi kuitikia Mradi huo wa Serikali ambao

alibainisha kuwa utatekelezwa ndani ya kipindi cha miaka minne ambapo

katika awamu ya kwanza mradi huo utatekelezwa katika vijiji 152 kwa

kipindi cha miezi 24 na vijiji vingine vilivyobaki 195 navyo

vitapatiwa umeme kwa kipindi kingine cha miezi 24.

Hata hivyo aliwataka wananchi kuutumia umeme watakaounganishiwa

katika shughuli mbalimbali za kiuchumi.

“Tunapenda sana umeme huu utumike kwenye shughuli za kilimo hususan

kilimo cha umwagiliaji, kuendeshea mitambo ya maji, lakini hata

kuanzisha viwanda vya kati ili kukuza uchumi wetu tunaamini kuwa umeme

huu utakuwa kichocheo kikubwa katika kusukuma maendeleo,” alisisitiza.

Vilevile, Naibu Waziri alibainisha kuwa lengo la Serikali ni kuwapatia

wananchi wote umeme pasipo kubagua aina ya makazi wanayoishi.

“Mahali popote mwananchi anapoishi, ndipo tutakapomtundikia umeme.

Hatutajali ni nyumba ya nyasi au ya ghorofa.”alisema

Kupitia uzinduzi huo, Naibu Waziri aliwatambulisha kwa wananchi na

viongozi wa mkoa  Wakandarasi wawili  ambao ni White City

International Contractors na Guang Dong Jianneng Electiric Power

Engineering Co Ltd watakaotekeleza Mradi huo ili kurahisisha

ufuatiliaji wa utekelezaji wa kazi zao pamoja na kuwapatia ushirikiano

stahiki.

Dkt Kalemani alitoa angalizo kwa Wakandarasi hao na kuwataka kuwatumia

wakandarasi wasaidizi wenye uwezo waliko ndani ya Mkoa wa Simiyu huku

akipiga marufuku kuingiza nguzo na transfoma kutoka nje ya nchini

sambamba na Shirika la Umeme Nchini (Tanesco) kuwasimamia katika kazi

Usiku na Mchana ili kuhakikisha kuwa mradi huo unaisha kwa wakati

uliopangwa.

Awali, akitoa hotuba ya utangulizi katika hafla hizo za uzinduzi,

Mkurugenzi Mkuu wa Wakala wa Nishati Vijijini (REA), Mhandisi Gissima

Nyamo-Hanga aliwataka wananchi watakaounganishiwa umeme kukamilisha

utandazaji wa nyaya katika nyumba zao mapema ili mkandarasi

atakapofika katika maeneo yao wawe tayari kulipia na kuunganishiwa

umeme.

Aidha alibainisha kwamba kwa nyumba ambazo utandazaji wa nyaya utakuwa

haujakamilika, wananchi wanaweza kuomba kufungiwa kifaa cha Umeme

Tayari (UMETA) ambacho hakihitaji nyumba nzima kutandazwa waya.

Mhandisi Nyamo-Hanga aliwaomba watendaji katika Serikali za Kata na

Vijiji, kubainisha maeneo maalum ya viwanda ambayo katika mradi huo

yatafikishiwa miundombinu ya umeme mkubwa ili kuwezesha wajasiriamali

vijijini kupatiwa umeme utakaowezesha kuanzishwa kwa viwanda vidogo

vidogo na vikubwa vijijini kwa gharama nafuu.

Gharama ya utekelezaji wa Mradi wa REA III kwa Mkoa wa Simiyu ni

shilingi bilioni 33.47.