EAC kushughulikia mgogoro wa Burundi

Rais wa jamhuri ya muungano wa tanzania na Mwenyekiti wa Jumuiya ya Afrika Mashariki mh Jakaya Kikwete 

Rais Jakaya Kikwete wa Tanzania ambaye kwa sasa ni mwenyekiti wa Jumuiya ya Afrika Mashariki amewataka mawaziri wa mambo ya nje kutoka nchi wanachama kufanya mazungumzo nchini Burundi, Jumatano kabla ya mkutano wa viongozi wa jumuiya hiyo.

Mindi Kasiga mkuu wa kitengo cha mawasiliano kwa umma katika wizara ya mambo ya nje na ushirikiano wa kimataifa nchini Tanzania na kusema mazungumzo hayo yanatarajiwa kuwa ya kwanza kufanyika kuelekea kikao cha dharura cha wakuu wa nchi za Jumuiya ya Afrika Mashariki.

Hii ni mara ya kwanza kwa jumuiya hiyo kutuma ujumbe wa ngazi ya mawaziri kwenda Bujumbura katika jitihada za kujaribu kumaliza mgogoro wa kisiasa katika nchi hiyo ambayo kwa miaka mingi imekuwa katika vita vya wenyewe kwa wenyewe.

Rais Pierre Nkurunziza wa Burundi

 

  

Hatua hiyo imekuja wakati ambapo viongozi wamekosolewa kwa kukaa kimya huku hali nchini Burundi ikizidi kuzorota.

Waziri wa mambo ya nje wa Burundi Laurent Kavakure alikuwa nchini Tanzania jana Jumatatu ambako alifanya mazungumzo na waziri mwenzake wa mambo ya nje wa Tanzania Bernard Membe kabla ya kutolewa kwa taarifa hiyo.

Chama cha Msalaba Mwekundu nchini Burundi kimesema watu wapatao kumi na wawili wameuawa tangu maandamano kuanza tarehe 26 Aprili baada ya Rais Pierre Nkurunziza kuteuliwa na chama chake tawala cha CNDD-FDD kugombea katika uchaguzi wa Juni mwaka huu